Sú var tíðin að á Íslandi var gefið út tímarit um íþróttir sem hét einfaldlega Íþróttablaðið. Kom það líklega út um tíu sinnum á ári þegar mest var.
Raunar var tímaritið gefið út í áratugi en ég þekki ekki hvað varð til þess að það lagðist af. Ef til vill var það einfaldlega tilkoma internetsins sem varð þess valdandi.
Foreldrar mínir gáfu grænt ljós á að ég væri áskrifandi að þessu tímariti sem barn og unglingur enda sjálfsagt margt verra hægt að glugga í en umfjöllun um íþróttalífið hérlendis. Dreifingin hjá Fróða hefur þá alla vega þurft að senda eitt eintak vestur á firði.
Eftir á að hyggja var tímaritið býsna metnaðarfullt, alla vega á þeim tíma sem um ræðir, en Þorgrímur Þráinsson stýrði þá efnistökum. Hægt er að kynna sér það allt saman á Þjóðarbókhlöðunni þar sem finna má blöðin í möppum rétt eins og Morgunblaðið sem fagnar 106 ára afmæli á morgun.
Sjá allan bakvörð Kristjáns á íþróttasíðum Morgunblaðsins í dag