Mikill áhugi á miðum í milliriðla

Handknattleikssamband Íslands hefur fengið talsvert af fyrirspurnum frá fólki sem vill sjá strákana okkar spila í milliriðlum á EM í handbolta sem nú stendur yfir.

Frétt af mbl.is

Íslendingar komnir áfram

Að sögn Róberts Geirs Gíslasonar, framkvæmdastjóra HSÍ, er áhuginn mikill. Sambandið á von á svörum síðar í dag frá mótshöldurum um hvort og hve marga miða Íslendingar geta fengið.

Slatti af miðum er til í milliriðlana og er Róbert Geir vongóður um að geta tekið frá 200 til 300 miða til að byrja með til að mæta eftirspurn.

Alexander Petersson spilaði vel gegn Rússum. AFP

Á bilinu 600 til 700 Íslendingar voru á leik Íslands og Rússlands í gær og um 600 Íslendingar verða á leiknum annað kvöld gegn Ungverjum. Þessir stuðningsmenn eru ekki komnir með miða í milliriðla en hluti þeirra hefur óskað eftir miðum.

Frétt af mbl.is

Gríðarlega þýðingarmikill leikur

HSÍ bíður einnig eftir staðfestingu á miðaverðinu. Róbert Geir telur að miðarnir verði að minnsta kosti ekki ódýrari en miðarnir í riðlakeppnina sem kostuðu um 14 þúsund krónur.

Leikir Íslands í milliriðlum fara fram 17., 19., 21. og 22. janúar í Malmö Arena.

• Blogga um frétt