Alþjóðaskíðasambandið FIS hefur tekið ákvörðun um að aflýsa heimsbikarmótum sem til stóð að halda á skíðasvæði í Yanqing í Kína í febrúarmánuði, vegna útbreiðslu kórónaveiru.
„Þrátt fyrir að áhættustigið í Yanqing sé lágt verður heilsa og velferð íþróttamannanna og annarra þátttakenda að vera í forgangi,“ segir Gian Franco Kasper, forseti FIS.
Til stóð að halda heimsbikarmót karla í bruni og risasvigi helgina 15. og 16. febrúar í brekkunum í Yanqing, sem er um 70 kílómetrum norðan við höfuðborgina Peking.