Simone Biles var valin íþróttakona ársins annað árið í röð og í þriðja skipti alls hjá Laureus-akademíunni í Berlín í dag. Biles hefur verið besta fimleikakona ársins síðustu ár og er margfaldur ólympíu- og heimsmeistari.
Laureus-akademían sem stendur fyrir valinu er skipuð 68 fyrrverandi stórstjörnum úr íþróttaheiminum. Ásamt Biles voru Alysson Felix, Megan Rapinoe, Mikaela Shiffrin, Naomi Osaka og Shelly Ann Fraster Pryce tilnefndar.
Biles vann fimm af sex gullverðlaunum sem í boði voru fyrir hana á HM í fyrra og er nú komin með 25 verðlaun á heimsmeistaramótum, þar af 19 gullverðlaun.
Hún vann sín fyrstu HM-gull árið 2013, þá aðeins sextán ára gömul, og hefur verið nær ósigrandi síðan þá. Þá vann hún fern gullverðlaun á Ólympíuleikunum í Ríó 2016.