Alþjóðaólympíunefndin og framkvæmdanefnd Ólympíuleikanna í Tókýó hafa gefið út nýja dagsetningu fyrir leikana.
Þeir verða haldnir í japönsku höfuðborginni frá 23. júlí til 8. ágúst 2021, nákvæmlega ári á eftir áætlun. Leikarnir áttu að fara fram 24. júlí til 9. ágúst á þessu ári en var sem kunnugt er frestað vegna kórónuveirunnar.
Sama er að segja um Ólympíumót fatlaðra, Paralympics, sem fer fram frá 24. ágúst til 5. september 2021 en fyrri dagsetningar voru 25. ágúst til 6. september 2020.