Tom Brady, sigursælasti leikstjórnandi í sögu NFL-deildarinnar í ruðningi, gekk á dögunum í raðir Tampa Bay Buccaneers frá New Englad Patriots, þar sem hann hafði spilað allan ferilinn.
Hjá Patriots spilaði hann alla tíð undir stjórn Bills Belichicks. Hafa einhverjir efast um að Brady hefði náð jafn langt ef ekki hefði verið fyrir Belichick. Brady svaraði því fullum hálsi í XM's-útvarpsþættinum sem Howard Stern hefur umsjón með.
„Það er ömurlegt að fólk skuli segja það. Ég get ekki unnið hans vinnu og hann ekki mína vinnu. Hann gerði mig að betri leikmanni og ég gerði hann eflaust að betri þjálfara,“ sagði Brady. Leikstjórnandinn og Belichick áttu ekki alltaf skap saman, en Brady segir það ekki ástæðuna fyrir félagsskiptunum.
„Það var kominn tími á að prófa eitthvað nýtt, ég veit ekki hvað ég get sagt meira. Ég afrekaði allt sem hægt var að afreka í tvo áratugi hjá stórkostlegu félagi,“ sagði Brady.
Umhverfið er allt annað hjá Buccaneers, sem hefur ekki komist í úrslitakeppnina síðan 2007. „Það er stór áskorun en ég er sannfærður um að tíminn minn þar verður virkilega góður. Ég hlakka til að læra á nýtt lið,“ sagði Brady.
Brady er 42 ára gamall og hefur unnið Ofurskálarleikinn, Super Bowl, sex sinnum með New England Patriots og fjórum sinnum verið valinn besti leikmaðurinn í úrslitaleiknum.