Emil Alengård, fyrrverandi landsliðsmaður Íslands í íshokkí, hefur verið ráðinn til starfa sem nýr þjálfari Fjölnis/Bjarnarins en hann var áður aðstoðarþjálfari sænska úrvalsdeildarfélagsins AIK.
Félagið tilkynnti um þetta á Facebook-síðu sinni í dag. Þá mun hann einnig taka þátt í verkefnum með íslenska landsliðinu samkvæmt Íshokkísambandi Íslands.
Emil er 32 ára gamall en hann lék með A-landsliði og yngri landsliðum Íslands um langt árabil áður en skautarnir fóru upp í hillu og er einn besti leikmaðurinn í sögu landsliðsins.
Hann hóf þjálfaraferilinn sem þjálfari U18-landsliðs Íslands í karlaflokki og var einnig aðstoðarþjálfari U20-landsliðsins. Undanfarin ár hefur hann þjálfað hjá liði AIK í Svíþjóð þar sem hann er fæddur og uppalinn en Emil á íslenska móður og sænskan föður.
Alexander Medvedev stýrði liðinu síðasta vetur en íshokkídeild félagsins ákvað að endurnýja ekki samning við hann en Alexander var áður leikmaður liðsins.