Ein sú efnilegasta látin 16 ára að aldri

Ein efnilegasta klifurkona heims, Luce Douady, er látin aðeins 16 ára að aldri eftir slys í frönsku ölpunum. Douady var talin gríðarlega líkleg til að vera valin í franska klifurliðið fyrir Ólympíuleikana í Tókýó á næsta ári þar sem keppt verður í klifri í fyrsta sinn.

Douady varð heimsmeistari ungmenna í klifri á Ítalíu á síðasta ári, aðeins 15 ára gömul. Hún var að klifra í frönsku ölpunum með vinum sínum um helgina þegar hún féll um 150 metra og lést samstundis. Franska klifursambandið sagði frá andláti hennar á heimasíðu sinni.

„Luce var ung íþróttakona og hluti af franska klifurliðinu, hún var ein sú efnilegasta og frábær keppniskona,“ segir meðal annars í tilkynningu sambandsins. „Það er með mikilli sorg sem við færum ykkur fregnir af andláti hennar.“

Douady var talin líkleg til að vinna sér inn keppnisrétt á Ólympíuleikunum, sem upprunalega áttu að fara fram í sumar, en hafa nú verið færðir til næsta árs.

• Blogga um frétt