Annar Englendinganna biðst afsökunar

Phil Foden, annar tveggja leikmanna enska karlalandsliðsins í knattspyrnu sem gerðust sekir um brot á íslenskum sóttvarnareglum í gær, hefur beðist opinberlega afsökunar á málinu. 

Foden skrifaði í færslu sinni á Twitter að hegðun hans hefði ekki verið í samræmi við væntingar. 

Foden, sem er leikmaður Manchester City í ensku úrvalsdeildinni, var ásamt Mason Greenwood, leikmanni Manchester United, sektaður af íslenskum yfirvöldum, en þeir unnu 1:0-sigur á íslenska liðinu í Þjóðadeild UEFA á laugardag. Fram kemur á vef RÚV að þeir hafi báðir greitt sektirnar. 

Frétt af mbl.is

Ensku leikmennirnir sektaðir af íslenskum yfirvöldum

Frétt af mbl.is

Enskir landsliðsmenn brutu íslenskar sóttvarnareglur

„Ég bið Gareth Southgate afsökunar, ég bið liðsfélaga mína í enska landsliðinu afsökunar, starfsmenn, stuðningsmenn og einnig félag mitt og fjölskyldu,“ skrifar Foden í yfirlýsingu sinni, en Southgate, sem er þjálfari enska landsliðsins, tilkynnti í dag að þeir Foden og Greenwood yrðu sendir aftur til Englands á meðan liðið fer til Danmerkur.

„Ég er ungur leikmaður og á margt ólært, en ég er meðvitaður um þá miklu ábyrgð sem ég ber sem leikmaður Manchester City og Englands á þessu stigi. Við þetta tilefni tók ég lélega ákvörðun og hegðun mín uppfyllti ekki þær væntingar sem gerðar eru til mín,“ segir Foden. 

• Blogga um frétt