Íþróttir sameina fólk, stjórnmál sundra

Zlatan Ibrahimovic.
Zlatan Ibrahimovic. AFP

Sænski knattspyrnumaðurinn Zlatan Ibrahimovic kveðst standa við þá yfirlýsingu sína að íþróttamenn eigi ekki að skipta sér af stjórnmálum, þótt bandaríski körfuboltamaðurinn LeBron James hafi sent honum tóninn.

Zlatan sagði í viðtali í síðustu viku að íþróttamenn eins og hinn sigursæli LeBron ættu ekki að vera að blanda sér í stjórnmál en einbeita sér frekar að íþrótt sinni.

LeBron hefur verið í fararbroddi NBA-leikmanna sem hafa látið í sér heyra varðandi kynþáttamisrétti og ofbeldi lögreglu í Bandaríkjunum. Hann svaraði ummælum Zlatans strax og sagðist aldrei myndu þegja yfir því sem ekki væri í lagi.

LeBron James
LeBron James AFP

Zlatan var spurður nánar út í þetta á fréttamannafundi í dag og hann kvaðst áfram á sömu skoðun.

„Kynþáttamisrétti og stjórnmál eru tveir ólíkir hlutir. Íþróttafólk sameinar heiminn, stjórnmál sundra honum. Í okkar umhverfi eru allir velkomnir, sama hver þeirra bakgrunnur er, og við gerum allt til að standa saman. Mín skilaboð? Íþróttafólk á að vera íþróttafólk, stjórnmálamenn eiga að vera stjórnmálamenn.

mbl.is