Úrslitaleikur enska deildabikarsins í knattspyrnu, sem fer fram 25. apríl þegar Tottenham og Manchester eigast við, verður tilraunaviðburður en átta þúsund áhorfendur verða á leiknum.
Er þetta mesti áhorfendafjöldi á knattspyrnuleik á Bretlandseyjum frá upphafi kórónuveirufaraldursins.
Áhorfendum var hleypt aftur á leiki í desember en þá voru þeir í mesta lagi fjögur þúsund. Fljótlega voru þeir þó aftur bannaðir frá leikjum þegar breska afbrigði kórónuveirunnar sótti í sig veðrið.
Leikurinn verður notaður sem tilraun fyrir frekari hópamyndanir, að því er fram kemur á vef BBC.
Boris Johnson, forsætisráðherra Bretlands, hefur áður greint frá því að öllum takmörkunum vegna faraldursins verði aflétt 21. júní.