Agalegur fnykur í bílnum

„Ég var eins árs gamall þegar ég upplifði mitt fyrsta rjúpnaveiðitímabil,“ sagði Sigurður Unnar Hauksson, margfaldur Íslandsmeistari í skotfimi og landsliðsmaður í greininni, í Dagmálum, frétta- og menningarlífsþætti Morgunblaðsins.

Sigurður Unnar er frá Húsavík og kemur úr mikilli veiðifjölskyldu en þannig kviknaði einmitt áhugi hans á skotfimi.

Hann hefur eytt miklum tími erlendis undanfarin ár þar sem hann hefur keppt fyrir Íslands hönd í skotfimi með haglabyssu en hann er ríkjandi Íslandsmethafi í unglingaflokki, fullorðinsflokki og liðakeppni í greininni.

„Ég fór í mína fyrstu veiðiferð með pabba, afa og bróður hans afa,“ sagði Sigurður Unnar.

„Pabbi ákvað að taka smá kvæk sem endaði á að vera einhverjir sex klukkutímar. Hann var nýfarinn út úr bílnum þegar ég kúkaði á mig.

Afi og bróðir afa voru ekkert að hafa fyrir því að skipta á mér og þegar pabbi kemur aftur í bílinn, sex tímum síðar, var þessi agalegi fnykur í bílnum,“ sagði Sigurður Unnar meðal annars.

Viðtalið við Sigurð Unnar í heild sinni má nálgast með því að smella hér.

mbl.is