Karlalið Hamars í blaki hefur styrkt leikmannahópinn fyrir komandi vetur og samið við Tomek Leik sem kemur frá KPS Gietrzwald í Póllandi.
Lið Hamars er Íslands- og bikarmeistari eftir frábært gengi síðasta vetur. Í tilkynningu frá Hamri kemur fram að Leik sé ætlað að fylla skarð Radoslaw Rybak, þjálfara liðsins, en hann gengdi stóru hlutverki innan sem utan vallar á síðustu leiktíð. Hann mun einbeita sér að þjálfun liðsins í vetur.
Leik er 26 ára og hefur alla tíð spilað í Póllandi. Hann er í leikmannahópi Hamars í kvöld þegar Hamar og Afturelding mætast í Meistarakeppni Blaksambandsins í Varmá í Mosfellsbæ.