Norðfirðingar byrja af miklum krafti

Þróttarar úr Fjarðabyggð hófu Íslandsmótið í blaki af miklum krafti um helgina en þrír leikir fóru fram í úrvalsdeildum karla og kvenna fyrir austan um helgina og höfðu Norðfirðingar betur í þeim öllum.

Kvennalið Þróttar tók á móti Þrótti úr Reykjavík í tveimur leikjum, á laugardag og sunnudag, og heimakonur unnu þann fyrri 3:1. Hrinurnar enduðu 25:13, 25:12, 23:25 og 25:22. Ester Rún Jónsdóttir úr Þrótti N. var með 19 stig og Arna Védís Bjarnadóttir úr Þrótti R. var með 17 stig.

Í  seinni leiknum í gær unnu heimakonur aftur 3:1 en samt í hörkuleik. Hrinurnar enduðu 20:25, 25:17, 25:20 og 25:17. María Jimenez var stigahæst hjá Þrótti N. með 16 stig en Arna Védís var aftur stigahæst hjá Þrótti R.

Karlalið Norðfirðinga tók á móti Fylki og vann öruggan sigur, 3:0. Hrinurnar enduðu 25:17, 25:17 og 25:15. Ramses Ballesteros skoraði 13 stig fyrir heimamenn, Andri Snær Sigurjónsson og Miguel Angel Ramos 11 stig hvor, en Alexander Stefánsson var stigahæstur hjá Fylki með 10 stig.

• Blogga um frétt