Íþrótta­deild Morg­un­blaðsins og mbl.is held­ur áfram að gramsa í mynda­safni Morg­un­blaðsins og birta á mbl.is á laug­ar­dög­um. 

Þessa frábæru mynd af Arnari Sigurðssyni, fyrrverandi atvinnumanni í tennis, tók Kristinn Ingvarsson og birtist hún á forsíðu Morgunblaðsins hinn 11. ágúst 2008. Arnar hafði þá tilkynnt um ákvörðun sína að láta staðar numið í atvinnumennskunni vegna bakmeiðsla. 

Arnar náði eiginlega lygilegum árangri í tennisíþróttinni ef horft er til þess að hérlendis er lítil hefð fyrir íþróttinni en hún geysilega stór á heimsvísu.

Arnar fékk skólastyrk í University of the Pacific-háskólanum í Kaliforníu og keppti fyrir skólann í tennis í bandarísku háskólaíþróttunum, NCAA. Arnar náði mjög langt í NCAA þar sem fjöldi verðandi atvinnumanna reyndi með sér. Hann vann sér keppnisrétt á lokamóti NCAA árið 2006 og árið áður var hann valinn leikmaður ársins í þeim riðli sem skólinn keppir í: Big West-deildinni. Auk þess fékk Arnar fjölda viðurkenninga í skólanum fyrir árangur sinn á tennisvellinum.

Þegar náminu sleppti freistaði Arnar gæfunnar og gerðist atvinnumaður. Tókst honum eitt árið að vinna sig upp um 800 sæti á heimslista atvinnumanna í greininni en hann sigraði þrívegis á alþjóðlegum mótum á ferlinum.

Arnari var heiður sýndur af Alþjóðatennissambandinu árið 2013 þegar hann fékk svokölluð Commitment-verðlaun ásamt fleirum. Verðlaunin voru afhent í tilefni af 100 ára afmæli Davis Cup-keppninnar, sem er liðakeppni á milli þjóða. Verðlaunin fengu þeir sem náð höfðu að keppa landsleiki á móti 50 þjóðum eða fleiri.

Arnar var þar í góðum félagsskap með köppum á borð við Björn Borg, John McEnroe, Andre Agassi, Boris Becker, Mats Wilander, Roger Federer og fleirum. 

Tengdar fréttir

Gamla ljósmyndin

Gamla ljósmyndin: Þekkt nöfn í 2. deild

• Gamla ljósmyndin: Stúdínur
• Gamla ljósmyndin: Bikarúrslit
• Gamla ljósmyndin: Sannfærandi gegn Serbum
• Gamla ljósmyndin: Norðurlandamet í Texas

» Fleiri tengdar fréttir

• Blogga um frétt