Skautafélag Reykjavíkur vann sinn fimmta sigur í átta leikjum á Íslandsmótinu í íshokkí karla í vetur með því að leggja Fjölni að velli í Reykjavíkurslag í Skautahöllinni í Laugardal í kvöld, 7:2.
SR er þá komið með 14 stig eftir átta leiki og sækir að Skautafélagi Akureyrar sem er með 16 stig en hefur aðeins leikið sex leiki. Fjölnir situr eftir á botninum með aðeins þrjú stig úr átta leikjum.
Axel Orongan og Sölvi Atlason komu SR í 2:0 áður en Aron Knútsson minnkaði muninn fyrir Fjölni í 2:1 undir lok fyrsta leikhluta.
Sölvi skoraði aftur, 3:1, Thomas Vidal minnkaði muninn í 3:2, en Kári Arnarsson kom SR í 4:2 áður en öðrum leikhluta lauk.
Eftir rúmar þrjár mínútur í síðasta leikhluta skoraði Robbie Sigurðsson og kom SR í 5:2. Þar með var mótspyrnan á enda og þeir Kári og Þorgils Eggertsson bættu við mörkum á lokakaflanum, 7:2.