„Ég hugsaði aldrei um að sleppa Ólympíuleikunum heldur sá ég það meira fyrir mér að ég væri þarna til þess að keppa fyrir pabba,“ sagði Anton Sveinn McKee, margfaldur Íslandsmeistari í sundi og þrefaldur Ólympíufari, í Dagmálum, frétta- og menningarlífsþætti Morgunblaðsins.
Anton Sveinn, sem er 27 ára gamall, hefur verið fremsti sundmaður landsins undanfarin ár en hann missti föður sinn í desember 2020.
Föðurmissirinn hafði mikil áhrif á bæði undirbúning og frammistöðu Antons Sveins á Ólympíuleikunum í Tókýó í sumar og af því leiddi að honum tókst ekki að sýna sínar bestu hliðar á leikunum.
„Ég sá það fyrir mér að hann væri að horfa á mig keppa að himnum ofan en auðvitað hefði ég viljað að hann hefði lifað aðeins lengur til þess að sjá mig keppa á leikunum,“ sagði Anton.
„Þetta var kannski farið að snúast aðeins of mikið um það að ég væri að keppa þarna fyrir hann sem var auðvitað fallegt og allt það.
Á sama tíma er þetta ekki beint rétta leiðin til þess að stíla inn á einhvern árangur heldur,“ sagði Anton Sveinn meðal annars.
Viðtalið við Anton Svein í heild sinni má nálgast með því að smella hér.