Tom Brady og liðsfélagar hans í Tampa Bay Buccaneers eru úr leik í úrslitakeppni bandarísku NFL-deildarinnar í amerískum fótbolta eftir tap gegn Los Angeles Rams í 8-liða úrslitum í Tampa í Flórída í gær.
Leiknum lauk með 30:27-sigri LA Rams sem leiddi 27:3 um miðjan þriðja leikhluta en Buccaneers tókst að jafna metin undir lok fjórða leikhluta.
LA Rams skoruðu hins vegar vallarmark þegar nokkrar sekúndur voru eftir af leiknum og fögnuðu dýrmætum sigri á ríkjandi meisturum í Tampa Bay.
Þá er Kansas City Chiefs einnig komið áfram í undanúrslit eftir dramatískan sigur gegn Buffalo Bills í Kansas, 42:36.
Mikið jafnfræði var með liðunum allan leikinn og þau skiptust á að skora og leiða í leiknum.
Staðan var jöfn, 36:36, eftir venjulegan leiktíma og því var gripið til framlengingar þar sem Kansas var sterkari aðilinn.
San Francisco 49ers unnu svo þriggja stiga sigur gegn Green Bay Packers í Green Bay, 13:10.
Úrslitin voru heldur óvænt enda Aaron Rodgers, leikstjórnandi Green Bay, af mörgum talinn besti leikstjórnandi deildarinnar.
Kansas City Chiefs tekur á móti Cincinnati Bengals í undanúrslitum úrslitakeppninnar á meðan Los Angeles Rams fær San Francisco 49ers í heimsókn um næstu helgi.