Leikstjórnandinn Colin Kaepernick æfir þessa dagana með bandaríska NFL-liðinu Las Vegas Raiders.
Frá þessu greindi Adam Schefter, fjölmiðlamaður hjá ESPN og sérfræðingur í NFL-deildinni, á Twitter-síðu sinni í dag.
Kaepernick, sem er 34 ára gamall, lék síðast með San Francisco 49ers í deildinni frá 2011 til 2016 en hann hefur verið án félags síðan samningur hans rann út í San Francisco árið 2016.
Á lokaári sínu hjá félaginu tók leikstjórnandinn upp á því að krjúpa á hné þegar þjóðsöngurinn var spilaður fyrir leiki í deildinni.
Með því að krjúpa vildi Kaepernick mótmæla misrétti í garð þeirra sem eru dökkir á hörund í Bandaríkjunum en mótmælin voru harðlega gagnrýnd af stjórnmálamönnum í Bandaríkjunum.
Síðan Kaepernick hætti að spila í deildinni hefur hann barist fyrir jafnrétti í Bandaríkjunum en á meðan hann var leikmaður San Francisco fór liðið alla leið í Ofurskálaleikinn árið 2012 og í úrslit NFC-deildarinnar ári síðar.