Yfir 40 tæki voru skráð í tíu flokkum þegar síðasta umferðin í Íslandsmótinu í spyrnu var haldin á dögunum á kvartmílubrautinni í Hafnarfirði.
Sumarið hefur verið líflegt en þátttaka hefur verið mjög góð og met hríðfallið með mögnuðum tilþrifum.
Aðstæður á laugardag voru góðar en þó veðrið hafi verið misjafnt þetta sumarið þá hefur keppnishald Íslandsmótsins tekist einstaklega vel.
Kvartmíluklúbburinn hefur einnig uppfært tækjabúnað til keppnishalds sem tryggir betra rennsli í keppnum og þéttara utanumhald um skipulag.
Door Slammer flokkurinn hefur verið mjög líflegur í sumar, mörg sérútbúin tæki hafa sett magnaðan tíma í keppnum sumarsins og baráttan á köflum verið mjög hörð.
Þannig hefur Stefán Kristjánsson átt besta árangurinn í sumar, en hann setti enn eitt metið í lokakeppninni, ók áttungsmílu á 4,895 sek á 144,2 mílna hraða sem hann síðan bakkaði upp með 4,911 sekúndum.
Það var þó Gunnlaugur Gunnlaugsson sem varð Íslandsmeistari eftir lokaumferðina með flest samanlögð stig tímabilsins.
Fimm keppendur mættu í TF flokkinn í lokaumferðinni á laugardag. Hörð barátta hefur verið í flokknum í allt sumar og mörg skemmtileg tilþrif.
Úrslitin á laugardag fóru á þann veg að Sirin Kongsanan sigraði á Honda Civic og í öðru sæti varð Benedikt Svavarsson á Camaro.
Þannig landaði Sirin Íslandsmeistaratitli eftir gott gengi í sumar.
Vel hefur gengið hjá Davíð Þór Einarssyni í flokki breyttra mótorhjóla, en hann ekur Suzuki Hayabusa.
Davíð hefur kitlað metin í allt sumar en hann endaði tímabilið með glæsilegu Íslandsmeti, ók kvartmíluna á 8,492 sekúndum á 164,7 mílna hraða sem hann síðan bakkaði upp með tímanum 8,55 sekúndum.
Tímabilinu er hvergi nærri lokið í sumar en á laugardag verður haldin keppni í áttungsmílu, King of the Street, á kvartmílubrautinni Hafnarfirði.
Þannig verður keppt eftir útsláttarkeppni í flokki bíla og mótorhjóla og keppendum verður raðað upp eftir viðbragðstíma á startljósum.
Það verður því allt galopið og ómögulegt að segja hverjir enda í úrslitum. Keppni hefst klukkan 15.
Eftirfarandi urðu Íslandsmeistarar eftir lokaumferðina á laugardag:
DS flokkur:
Gunnlaugur Gunnlaugsson BA
T/C flokkur:
Harry Hólmgeirsson KK
T/D flokkur:
Sigurður Ólafsson KK
T/E flokkur:
Ragnar S Ragnarsson BA
T/F flokkur:
Sirin Kongsanan KK
B flokkur:
Davíð Þór Einarsson KK
G+ flokkur:
Hrannar Óttarsson BA