Norræn íþróttasamtök, ólympíunefndir og íþróttasamtök fatlaðra, héldu sinn árlega fund í Osló dagana 22. - 23. september sl. Á þeim fundi var yfirlýsing samþykkt varðandi stöðu mála í Úkraínu.
Yfirlýsingin er til komin vegna nýjustu vendinga í stríði Rússa við Úkraínu síðustu daga og hótanir um beitingu kjarnorkuvopna.
Yfirlýsingin hefur þegar verið send til Alþjóðaólympíunefndarinnar (IOC), Evrópusambands Ólympíunefnda (EOC), Heimssambands Ólympíunefnda (ANOC), Alþjóðaólympíuhreyfingar fatlaðra (IPC) og Evrópuhluta IPC (EPC).
Yfirlýsingin er svohljóðandi:
„Norræn íþróttasamtök, ólympíunefndir og íþróttasamtök fatlaðra álykta að innrás Rússlands í Úkraínu brjóti gróflega gegn alþjóðalögum.
Árásir Rússa í Úkraínu eru að stigmagnast. Við slíkar aðstæður er það óviðunandi að greiða götuna fyrir alþjóðlega íþróttaþátttöku Rússa og Hvít-Rússa. Við stöndum þétt saman í afstöðu okkar. Nú er ekki rétti tímapunkturinn til að íhuga endurkomu þeirra.
Við skorum á ólympíuhreyfinguna og íþróttasamtök fatlaðra og öll alþjóðleg íþróttasamtök að halda áfram að sýna samstöðu með úkraínsku þjóðinni og kröfunni um frið. Við styðjum áfram við tilmæli okkar um að allir rússneskir og hvítrússneskir íþróttamenn og embættismenn fái ekki að taka þátt í alþjóðlegum íþróttum.“
Yfirlýsing var samþykkt af formönnum eftirfarandi stofnana:
Danmörk
Danska Ólympíunefndin og íþróttasambandið, Hans Natorp
Danska Ólympíunefnd fatlaðra, John Petersson
Finnland
Finnska Ólympíunefndin, Jan Vapaavuori
Finnska Ólympíunefnd fatlaðra, Sari Rautio
Ísland
Íþrótta- og Ólympíusamband Íslands, Lárus Blöndal
Íþróttasamband fatlaðra, Þórður Árni Hjaltested
Noregur
Norska Ólympíu- og Ólympíunefnd fatlaðra og Íþróttasambandið, Berit Kjøll
Svíþjóð
Sænska Ólympíunefndin, Mats Årjes
Sænska íþróttasambandið, Björn Eriksson
Sænska Ólympíunefnd fatlaðra, Åsa Llinares Norlin
Grænland
Íþróttasamband Grænlands, Nuka Kleemann
Færeyjar
Íþróttasamband Færeyja og Ólympíunefnd, Elin Heðinsdóttir
Ólympíunefnd fatlaðra í Færeyjum, Petur Elias Petersen
Álandseyjar
Íþróttasamband Álandseyja, Anders Ingves