Íþróttadeild Morgunblaðsins og mbl.is heldur áfram að gramsa í myndasafni Morgunblaðsins og birta á mbl.is á laugardögum.
Borgnesingurinn Íris Grönfeldt setti sterkan svip á íþróttalífið hérlendis á níunda áratugnum. Íris var í fremstu röð í spjótkasti og er tvöfaldur ólympíufari í greininni. Keppti hún í spjótkasti á Ólympíuleikunum í Los Angeles árið 1984 og í Seoul árið 1988.
Íris hafnaði í 22. sæti í Los Angeles með 48,70 metra og 26. sæti með 54,28 metra í Seoul.
Meðfylgjandi mynd af Írisi í undirbúningi hennar fyrir leikana árið 1988 tók Emilía Björg Björnsdóttir sem myndaði árum saman fyrir Morgunblaðið.
Íris gat kastað geysilega langt á góðum degi og sýndi það í Osló 19. maí árið 1988 þegar hún kastaði spjótinu 62,02 metra og setti Íslandsmet.
Sprengikrafturinn í Írisi var óumdeildur því hún setti Norðurlandamet í ólympískum lyftingum árið 1988 þegar hún lyfti samtals 167,5 kg í 67,5 kílógramma flokki. Hefði það dugað í 4. sæti á HM í þessum þyngdarflokki.
Íris keppti á heimsmeistaramóti í ólympískum lyftingum og hafnaði í 10. sæti með því að lyfta 140 kg samtals.
Íþróttahreyfingin fékk að njóta krafta Írisar eftir að keppnisferlinum sleppti og var hún sæmd gullmerki UMFÍ fyrir starf í þágu frjálsíþrótta á Íslandi.