Átta liða úrslitum NFL-deildarinnar í ameríska fótboltanum lauk í nótt. Í Þjóðadeildinni valtaði lið Philadeilphia Eagles yfir lið New York Giants, 38:7, þar sem Jalen Hurts, leikstjórnandi Philadelphia kastaði fyrir tveimur snertimörkum. Philadelphia mun hýsa úrslitaleik Þjóðadeildarinnar þar sem liðið mætir San Francisco 49ers sem hafði betur gegn Dallas Cowboys, 19:12, þrátt fyrir að Dallas hafi skorað tvö snertimörk gegn einu snertimarki San Francisco.
Í Ameríkudeildinni verða það Kansas City Chiefs og Cincinatti Bengals sem mætast í úrslitum. Kansas sigraði Jacksonville Jaguars, 27:20, þar sem leikstjórnandinn og Íslandsvinurinn Patrick Mahomes kastaði fyrir tveimur snertimörkum fyrir Kansas á öðrum fætinum en hann lék meiddur á ökkla. Mahomes er eiginmaður Brittany Mahomes, sem var búsett hér á landi sumarið 2017 þegar hún lék fótbolta með liði Aftureldingar/Fram.
Það voru svo gestirnir í Cincinatti Bengals með leikstjórnandann Joe Burrow í broddi fylkingar sem sigruðu Buffalo Bills nokkuð örugglega í Buffalo, 27:10. Burrows kastaði fyrir tveimur snertimörkum en Buffalo Bills voru án varnarmannsins Damar Hamlin, sem fékk hjartaáfall í miðjum leik þessara liða í byrjun janúar. Hamlin er kominn á fætur sem betur fer og var meðal áhorfanda í gær.
Úrslitaleikirnir í Þjóðadeild og Ameríkudeild fara fram næsta sunnudag og úrslitaleikurinn sjálfur þar sem leikið verður að venju um Ofurskálina, „SuperBowl LVII“, fer fram 12. febrúar næstkomandi.