Haraldur Nelson, faðir bardagakappans Gunnars Nelson og umboðsmaður hans, segir að þær fjárhæðir sem Gunnar er í erlendum miðlum sagður hafa þénað fyrir bardaga sinn við Bryan Barberena á laugardag séu algjörlega úr lausu lofti gripnar.
Vefmiðillinn TotalSport greinir frá því að Gunnar hafi fengið greidda í kringum 465 þúsund bandaríkjadali fyrir bardagakvöldið en inni í þeirri upphæð eru allar greiðslur, bónusar og styrktarsamningar. Það gerir rúmlega 65 milljónir íslenskra króna.
„Þetta er tóm þvæla, ég vildi að þetta væri satt en þetta er tóm þvæla,“ segir Haraldur í samtalið mbl.is.
„Total Sport hefur áður þóst vera með nákvæmar tölur en þetta er tóm þvæla. Gunnar fær 50 þúsund dollara fyrir frammistöðuna en samningur hans við UFC er því miður ekki alveg svona hár en menn fá ágætlega borgað fyrir þetta samt,“ segir hann en 50 þúsund bandaríkjadalir samsvara rúmum sjö milljónum króna.
Haraldur sagðist aðspurður ekki getað tjáð sig um krónur og aura í þessu sambandi vegna trúnaðarákvæða í samningi.
„Ef UFC gefur það upp þá er það bara fínt en það sem ég get sagt er að það er talsvert lægra en þetta,“ segir hann.