Íþróttir | mbl | 19.9.2024 | 6:00 | Uppfært 7:55

Af hverju er þetta fólk ekki að þjálfa á Íslandi?

„Ef við tökum þessi milljarðafyrirtæki hér á landi sem dæmi, eru þau ekki best í heimi í sínu fagi?“ sagði Vésteinn Hafsteinsson, afreksstjóri Íþrótta- og Ólympíusambands Íslands, í Dagmálum.

Vésteinn, sem er 63 ára gamall, var ráðinn afreksstjóri ÍSÍ í janúar á síðasta ári eftir afar farsælan feril í íþróttum, fyrst sem kringlukastari og síðar sem afreksþjálfari.

Besta mögulega forvörnin fyrir börnin okkar

Samfélagsleg skylda fyrirtækjanna

Vésteinn setur spurningamerki við það af hverju margir af færustu þjálfurum Íslands séu að þjálfa á erlendri grundu.

„Mikið af þessu fólki innan fyrirtækjana er íþróttafólk sem vill sjá íþróttir halda áfram að þróast í rétta átt,“ sagði Vésteinn.

„Það er líka samfélagsleg skylda fyrirtækjanna að gefa til baka og sjá til þess að íslenskt samfélag haldi áfram að þróast. Þess vegna er það þannig, í öllum löndunum í kringum okkur, að ríkið kemur með 70% af fjármagninu inn í íþróttahreyfinguna og fyrirtækin í landinu koma með 30% af fjármagninu.

Ég sé ekki að við þurfum að finna upp hjólið í þessu og þetta virkar erlendis. Af hverju ætti þetta ekki að virka á Íslandi? Ég var að þjálfa í svona kerfi og ég vann medalíur.

Alfreð Gíslason, Þórir Hergeirsson, Dagur Sigurðsson, Elísabet Gunnarsdóttir og Heimir Hallgrímsson eru öll að þjálfa erlendis og ná í medalíur. Af hverju er þetta fólk ekki að þjálfa á Íslandi. Eigum við ekki bara að gera þetta hérna heima og ná í medalíur hér?“ sagði Vésteinn meðal annars.

Viðtalið við Véstein í heild sinni má nálgast með því að smella hér eða á hlekkinn hér fyrir ofan.