Ísland fékk þrenn gullverðlaun í Höllinni

Ísland vann þrenn gullverðlaun á Norðurlandamótinu í boccia sem fram fór í Laugardalshöllinni um helgina.

Ingi Björn Þorsteinsson varð tvöfaldur Norðurlandameistari en hann sigraði í flokki 2 eftir að hafa lagt Tulju Sinisalo frá Finnlandi að velli í úrslitaleiknum, 6:1.

Ingi varð einnig meistari í parakeppni þar sem hann og Hlynur Steingrímsson, liðsfélagi hans úr ÍFR, stóðu uppi sem sigurvegarar.

Þriðja titilinn vann svo Kolbeinn Skagfjörð úr Akri en hann varð Norðurlandameistari í parakeppni með finnskum keppanda.