Það var margt sem kom á óvart í 8-manna úrslitum Íslandsmótsins í holukeppni á Urriðavelli í dag. Ragna Björk Ólafsdóttir úr GK gerði sér lítið fyrir og vann Íslandsmeistarann í höggleik, Nínu Björk Geirsdóttur úr Kili á 26. holu í bráðabana. Ragna mætir Valdísi Þóru Jónsdóttur úr Leyni í undanúrslitum. Valdís vann Tinnu Jóhannsdóttur úr GK á 19. holu í bráðabana og kemur sá sigur einnig á óvart.
Þórdís Geirsdóttir úr Keili heldur uppi merkjum eldri og reyndari kylfinga í undanúrslitunum en hún leikur gegn Ólafíu Þórunni Kristinsdóttur úr GR. Þórdís vann Helenu Árnadóttur úr GR í dag, 2/1, og Ólafía sigraði Helgu Rut Svanbergsdóttur, 5/4.
Ólafía hefur lagt tvo kylfinga að velli sem fagnað hafa Íslandsmeistaratitlinum í holukeppni en hún vann Ragnhildi Sigurðardóttur í 1. umferð.
Undaúrslitaleikir:
Ragna Björk Ólafsdóttir, GK - Valdís Þóra Jónsdóttir Leynir.
Þórdís Geirsdóttir, GK - Ólafía Þórunn Kristinsdóttir, GR.