Heiðar Davíð Bragason og Sigurpáll Geir Sveinsson kylfingar úr Kili Mosfellsbæ eru þeir einu af alls fimm íslenskum kylfingum sem eiga raunhæfan möguleika á að komast í gegnum 1. stig úrtökumótsins fyrir Evrópumótaröðina í golfi að loknum fyrsta keppnisdegi. Leikið er á þremur völlum samtímis í tveimur löndum, Englandi og Þýskalandi. Heiðar Davíð lék vel í dag eða á 2 höggum undir pari Fleesensee vallarins í Þýskalandi, 70 höggum, og er hann í 16.-25. sæti af alls 99 kylfingum. Sigurpáll er í 40.-48. sæti á sama velli en hann lék á 72 höggum í dag. Alls fá 26 efstu kylfingarnir á þessum velli keppnisrétt á 2. stigi úrtökumótsins.

Magnús Lárusson úr Kili lék illa á Chart Hills vellinum á Englandi en hann er í 99.-100. sæti af alls 104 keppendum eftir að hafa leikið á 12 höggum yfir pari eða 82 höggum. Ottó Sigurðsson, Íslandsmeistari í holukeppni, úr GKG og Örn Ævar Hjartarson úr GS, léku báðir á 80 höggum eða 8 höggum yfir pari á Oxfordshire golfvellinum á Englandi. Þeir eru í 101-105. sæti af alls 110 keppendum en 29 kylfingar komast áfram á 2. stigið af þessum velli að loknum fjórða og síðasta keppnisdegi.

Tengdar fréttir

Golf: Íslenska mótaröðin

„Undirritun skjalsins var breytt“

• Íslandsmótið í höggleik í Vestmannaeyjum
• Golfklúbbur Reykjavíkur tekur að sér rekstur Garðavallar
• Ólafur og Heiða slá lengst allra á Íslandi
• Heiðar í 33. sæti eftir fyrsta hringinn í Skandeborg

» Fleiri tengdar fréttir

• Blogga um frétt