Kylfingurinn Tiger Woods og eiginkona hans Elin eignuðust son þann 8. febrúar s.l. og er það annað barn þeirra en fyrir áttu þau dótturina Sam Alexis sem fæddist í júní árið 2007. Í gær voru birtar myndir af fjölskyldunni og eru það fyrstu myndirnar sem birtast af þeim frá því að sonurinn Charlie Axel Woods kom í heiminn.
Woods er tekjuhæsti íþróttamaður heims en hann hefur ekkert leikið á atvinnumótum frá því hann sigraði á opna bandaríska meistaramótinu í Torrey Pines vellinum í júní á s.l. ári. Woods var með slitið krossband í hné á því móti og fór hann í aðgerð að því loknu.
Á ferlinum hefur Woods sigrað á 14 stórmótum en aðeins Jack Nicklaus hefur sigrað á fleiri stórmótum á ferlinum eða 18 alls.
Stórmótin fjögur eru Mastersmótið, opna bandaríska meistaramótið, opna breska meistaramótið og PGA-meistaramótið.
Woods ætlar sér að leika á Mastersmótinu sem fram fer í byrjun apríl en líklega mun hann keppa á heimsmótinu sem fram fer í Miami 12.-15. mars.