Birgir Leifur Hafþórsson lék annan hringinn á Hainan Open-mótinu sem fram fer í Kína þessa dagana á 65 höggum eða sjö höggum undir pari vallarins. Mótið er hluti af Áskorendamótaröð Evrópu.
Birgir Leifur lék fyrsta hringinn á 71 höggi eða einu höggi undir pari vallarins og var í 33.-41. sæti af 126 keppendum eftir fyrsta hringinn.
Birgir Leifur hefur nú leikið fyrstu hringina tvo á átta höggum undir pari vallarins og er í sjötta sæti á mótinu. Birgir Leifur er fjórum höggum á eftir Suður-Afríkumanninum Erik van Rooyen sem er í forystu.