Ólafía Þórunn Kristinsdóttir, atvinnukylfingur spilaði annan hringinn á LPGA Keb Hana-mótinu í Suður-Kóreu á 79 höggum eða sjö höggum yfir pari vallarins í nótt.
Ólafía Þórunn lék fyrsta hring mótsins á tveimur höggum yfir pari vallarins og hún hefur þar af leiðandi leikið hringina tvo á níu höggum yfir pari vallarins. Ólafía Þórunn er i 77. sæti á mótinu.
Enginn niðurskurður er á LPGA Keb Hana-mótinu og Ólafía Þórunn mun því spila síðustu tvo hringina. Þar getur hún freistað þess að mjaka sér upp töfluna.
Mótið er 22. mótið sem hún tekur þátt í á LPGA-mótaröðinni sem er sterkasta mótaröð heims í golfi kvenna.