Jafntefli í lokaleiknum hjá Ólafíu

Ólafía Þórunn Kristinsdóttir var einn níu fulltrúa Evrópu á Drottningamótinu.
Ólafía Þórunn Kristinsdóttir var einn níu fulltrúa Evrópu á Drottningamótinu. AFP

Ólafía Þórunn Kristinsdóttir og liðsfélagar hennar í úrvalsliði Evrópu enduðu í fjórða og neðsta sæti á Drottningamótinu í golfi sem fram fór í Japan. Heimakonur fögnuðu sigri á mótinu en þær unnu Suður-Kóreu í úrslitaleiknum.

Lið Evrópu og Ástralíu léku um 3. sæti mótsins þar sem Ástralar höfðu betur, 5:3. Leikinn var fjórmenningur á lokadeginum þar sem tveir keppendur leika saman í liði og leika einum bolta til skiptis. Ólafía lék með Englendingnum Annabel Dimmock og gerðu þær jafntefli í sínum leik við Hannah Green og Whitney Hillier. Ólafía og Annabel lentu undir á 4. holu en jöfnuðu strax metin og voru svo yfir frá 8.-14. holu, ýmist 1 eða 2 höggum, áður en þær áströlsku náðu að jafna á 15. holu. Liðin léku svo á sama höggafjölda síðustu þrjár brautirnar.

Ólafía er fyrst Íslendinga til að spila í liðakeppni á borð við Drottningamótið. Á fyrsta keppnisdegi töpuðu þær Carly Booth frá Skotlandi 4/3 í leik við par frá Suður-Kóreu, í fjórbolta. Á öðrum keppnisdegi tapaði Ólafía naumlega í tvímenningi gegn Sarah Kemp frá Ástralíu, 2/1. Þriðji og síðasti keppnisdagur var svo í dag, og eins og fyrr segir vann Japan mótið en liðið lagði Suður-Kóreu að velli, 7:1, í úrslitaleiknum.

mbl.is