Rickie Fowler tryggði sér sigur á Hero World Challenge mótinu í golfi sem lauk á Bahamaeyjum í gærkvöld með frábærum lokahring.
Fowler lék hringinn á hvorki meira né minna en 11 höggum undir pari og lauk keppni á 270 höggum eða 18 höggum undir pari. Bandaríkjamaðurinn Charlie Hoffman endaði í öðru sæti á 274 höggum en fyrir lokahringinn var hann með fimm högga forskot á næstu menn. Englendingurinn Tommy Fleetwood og Bandaríkjamaðurinn Jordan Spieth komu svo næstir á 276 höggum eða 12 höggum undir parinu.
Tiger Woods átti góðan lokahring sem hann lék á fjórum höggum undir pari og hann endaði í 9. sæti af 18 keppendum á 280 höggum eða átta höggum undir pari. Hann var að keppa á sínu fyrsta móti í 10 mánuði en Woods hefur glímt við þrálát bakmeiðsli.
Woods heldur Hero World Challenge árlega og þar sem einungis bestu kylfingum heims er boðið að taka þátt en mótið er leikið til styrktar Tiger Woods góðgerðarsjóðnum (e. Tiger Woods Foundation).