Guðrún Brá gaf eftir

Guðrún Brá Björgvinsdóttir úr Keili komst í gegnum niðurskurð keppenda fyrir fimmta og lokahringinn á lokaúrtökumótinu fyrir Evrópumótaröðina í golfi. Staða hennar versnaði þó í dag við það að leika á 75 höggum eða á þremur yfir pari. 

Leikið er í Marokkó og að loknum lokahringnum á morgun fá 25 efstu kylfingarnir keppnisrétt á mótaröðinni á næsta ári. 60 kylfingar komust í gegnum niðurskurðinn af 106 en Guðrún er í 51.-58. sæti. 

Hringurinn í dag er hennar versti í mótinu. Hún lék fyrsta hringinn á 74 höggum en næstu tvo mjög vel á 70 höggum. Hún er samtals á höggi yfir pari og er fjórum höggum frá þeim sætum sem gefa keppnisrétt á Evrópumótaröðinni eins og staðan er núna. Með öðrum orðum þarf Guðrún á frábærum hring á morgun til að eiga möguleika. 

Með því að vera á meðal 59 efstu gæti Guðrún þó mögulega öðlast takmarkaðan keppnisrétt á mótaröðinni á næsta ári. Henni gæti verið boðið í einhver mót fyrir að komast svo langt í úrtökumótunum en það liggur ekki fyrir að svo stöddu. 

• Blogga um frétt