Valdís Þóra Jónsdóttir, kylfingur úr Golfklúbbnum Leyni á Akranesi, jafnaði besta árangur íslensks kylfings í sterkustu mótaröð Evrópu með því að hafna í þriðja sæti á Australian Ladies Classic-golfmótinu sem lauk í Bonville í Ástralíu í morgunsárið.
Mótið er hluti af sterkustu atvinnumótaröð Evrópu, LET Europeantour, en Valdís Þóra hefur tvívegis endað í þriðja sæti í þessari mótaröð sem er besti árangur sem íslenskur kylfingur hefur náð í sterkustu mótaröð í Evrópu, í kvenna- og karlaflokki.
Valdís Þóra er eftir þennan glæsilega árangur á þessu móti í sjötta sæti á peningalista mótaraðarinnar, en fyrir það að hafna í þriðja sæti á mótinu fékk hún verðlaunafé sem samsvarar einni milljón króna.
Ólafía Þórunn Kristinsdóttir, kylfingur úr GR, varð í 14. sæti á þessu mót, en þetta er í fyrsta sinn sem tveir keppendur frá Íslandi eru á meðal 15 efstu í sterkustu mótaröð Evrópu.
Valdís varð þriðja í Bonville.