Atvinnukylfingurinn Ólafía Þórunn Kristinsdóttir lék á löngum köflum sitt besta golf í langan tíma á þriðja hringnum á Kia Classic-mótinu sem fram fer í Kaliforníu. Hún lék hringinn samanlagt á 68 höggum eða fjórum höggum undir pari og er hún einmitt á samtals fjórum höggum undir pari eftir þrjá hringi.
Hún fékk átta fugla, fjóra skolla og sex pör á 18 brautum og vann sig hægt og rólega upp um sæti. Ólafía lék fyrsta hringinn á 73 höggum, annan hringinn á 71 höggi og hefur hún því bætt sig með hverjum hringnum.
Þegar þessi frétt er skrifuð er Ólafía í 32.-48. sæti, en það gæti breyst er allir kylfingar klára þriðja hringinn. Síðasti hringur mótsins fer fram á morgun og mun mbl.is halda áfram að fylgja Ólafíu í beinni textalýsingu.