Ólafía Þórunn Kristinsdóttir hefur leik á morgun á Kingsmill Championship mótinu í golfi sem fram fer í Virginíu í Bandaríkjunum.
Mótið er hluti af LPGA-mótaröðinni og verður það tíunda sem Ólafía tekur þátt í á þessu tímabili. Hún hefur komist í gegnum niðurskurðinn á þremur þeirra en bestu árangri náði hún á Bahama þar sem hún endaði í 26. sæti.
Ólafía Þórunn hafnaði í 32. til 45. sæti á Texas Classic-mótinu sem lauk um síðustu helgi en aðeins voru leiknir tveir hringir á mótinu vegna slæmra veðurskilyrða. Hún fór upp um 19 sæti á peningalista mótaraðarinnar og er í 101. sæti.