Ólafía Þórunn Kristinsdóttir er að öllum líkindum úr leik á Kingsmill Championship-mótinu á LPGA-mótaröðinni í Virginíufylki í Bandaríkjunum. Hún lék annan hringinn í dag á 71 höggi eða á pari, rétt eins og hún gerði á fyrsta hring og er hún því samanlagt á parinu.
Útlitið var gott hjá Ólafíu fyrir síðustu tvær holurnar er hún var á þremur höggum undir pari. Tvöfaldur skolli á næstsíðustu og skolli á síðustu holunni gerði það hins vegar að verkum að hún fór á parið.
Flestir kylfingar eiga eftir að ljúka leik og gæti staða Ólafíu því breyst og hún farið áfram, en sem stendur þurfa kylfingar að vera á einu höggi undir pari til að fara áfram.