Guðmundur Ágúst Kristjánsson, kylfingur úr Golfklúbbi Reykjavíkur endaði í 9.-12. sæti á Stora Hotellet Bryggan Fjällbacka-mótinu sem haldið er í Svíþjóð og er hluti af Nordic Tour-mótaröðinni í golfi.
Guðmundur lék hringina þrjá á 67, 71 og 68 höggum og endaði leik á samtals sjö höggum undir pari og var þremur höggum frá efstu mönnum. Guðmundur lék þriðja hringinn í dag og fékk fjóra fugla, einn skolla og 13 pör.
Axel Bóasson bar sigur úr býtum á mótaröðinni á síðasta ári, sem er í 3. styrkleikaflokki í Evrópu á eftir Áskorendamótaröðinni og Evrópumótaröðinni.