Íþróttir | Golf | mbl | 11.7.2018 | 7:15 | Uppfært 8:03

Á pari í 10. sæti á EM

Karlalandsliðið. Frá vinstri: Jussi Pitkänen, Björn Óskar Guðjónsson (GM), Gísli Sveinbergsson (GK), Rúnar Arnórsson (GK), Henning Darri Þórðarson (GK), Aron Snær Júlíusson (GKG), Bjarki Pétursson (GB), Arnór Ingi Finnbjörnsson. Ljósmynd/golf.is

Íslenska karlalandsliðið í golfi er í 10. sæti eftir fyrsta keppnisdaginn á Evrópumótinu sem hófst í Þýskalandi í gær.

Á fyrstu tveimur keppnisdögunum er leikinn höggleikur þar sem fimm bestu skorin telja. Átta efstu liðin komast í A-riðil og eiga möguleika á að vinna til verðlauna, liðin sem enda í sætum 9 eða neðar keppa í B-riðli þar sem leikið er um sæti. Ísland er á parinu samtals.

Skor íslenska liðsins á fyrsta keppnisdeginum var þannig:

Aron Snær Júlíusson (GKG), 73 högg (+1)
Bjarki Pétursson (GB), 75 högg (+3)
Björn Óskar Guðjónsson (GM), 72 högg (par)
Gísli Sveinbergsson (GK), 70 högg (-2)
Henning Darri Þórðarson (GK), 75 högg (+3)
Rúnar Arnórsson (GK), 70 högg (-2)

Kvennalandsliðið. Frá vinstri: Björgvin Sigurbergsson, þjálfari, Anna Sólveig Smáradóttir (GK), Saga Traustadóttir (GR), Andrea Bergsdóttir (GKG), Helga Kristín Einarsdóttir (GK), Berglind Björnsdóttir (GR), Ragnhildur Kristinsdóttir (GR) og Guðný Þóra Guðnadóttir sjúkraþjálfari. Ljósmynd/golf.is

Kvennalandsliðið er í 19. sæti og því neðsta á Evrópumóti kvenna sem fram fer á GC Murhof-vellinum í Austurríki. Alls eru sex leikmenn í hverju liði og fimm bestu skorin telja í höggleikskeppninni sem fram fer fyrstu tvo keppnisdagana.

Andrea Bergsdóttir (GKG) lék best allra í dag í íslenska liðinu eða 74 höggum (+2).

Skor íslenska liðsins var eftirfarandi:

Andrea Björg Bergsdóttir (GKG) 74 högg (+2)
Anna Sólveig Snorradóttir (GK) 79 högg (+7)
Berglind Björnsdóttir (GR) 80 högg (+8)
Helga Kristín Einarsdóttir (GK) 81 högg (+9)
Ragnhildur Kristinsdóttir (GR) 75 högg (+3)
Saga Traustadóttir (GR) 78 högg (+6)