Atvinnukylfingurinn Axel Bóasson náði sér engan veginn á strik á fyrsta hring Le Vaudreuil Golf Challenge-mótinu sem fram fer í La Vaudreuil í Frakklandi. Mótið er hluti af Áskorendamótaröð Evrópu.
Axel lék holurnar átján á 83 höggum eða tólf höggum yfir pari og er hann neðstur ásamt Rhys Davies frá Wales. Axel var á einu höggi undir pari eftir fjórar holur en eftir það fór að halla undan fæti.
Hann fékk skolla á fimmtu holunni og fimmfaldan skolla á sjöttu holunni og þrefaldan skolla á níundu holunni. Fjórir skollar bættust svo við á síðari níu holunum og er hann því í slæmum málum og nánast útilokað að hann fari í gegnum niðurskurðinn eftir annan daginn á morgun.