Birgir Leifur Hafþórsson lék annan hringinn á Valderrama Masters-mótinu í golfi á 72 höggum, eða einu höggi yfir pari og bætti hann sig um þrjú högg á milli hringja. Það dugði honum hins vegar ekki til að komast í gegnum niðurskurðinn. Birgir lauk leik á samanlagt fimm höggum yfir pari og var þremur höggum frá niðurskurði.
Mótið fer fram á Valderrama-vellinum á Spáni, en hann er þekktastur fyrir að hafa verið vettvangur keppninnar um Ryder-bikarinn árið 1997. Mótið er hluti af Evrópumótaröðinni.
Spánverjinn Sergio Garcia, einn af skipuleggendum mótsins, er í efsta sæti á fimm höggum undir pari, eins og Ashley Chesters frá Englandi.