Ólafía Þórunn Kristinsdóttir náði sér ekki nægilega vel á strik á fyrsta hringnum á lokaúrtökumótinu fyrir LPGA -mótaröðina í golfi sem hófst í Bandaríkjunum í dag.
Ólafía lék hringinn á 77 höggum eða fjórum höggum yfir pari og er hún í 53.-74. sæti. Ólafía fékk einn fugl og fimm skolla
Jacklyn Lee frá Kanada átti besta skor dagsins en hún lék á 68 höggum eða fjórum höggum undir pari.
Ólafía er í baráttu um að halda sæti sínu á LPGA-mótaröðinni í golfi, sterkustu mótaröð heims í kvennaflokki. Hún náði ekki að vera nægilega ofarlega á LPGA í ár til að tryggja sér keppnisréttinn áfram og er nú í hópi 102 kvenna sem slást um að vera þar á næsta ári.
Ólafía kemur beint inn á þriðja og síðasta stigi úrtökumótanna, þar sem hún lék á LPGA í ár og í fyrra. Um sannkallað golfmaraþon er að ræða, því leiknir eru átta hringir, samtals 144 holur, í tveimur fjögurra daga törnum en keppt er á Pinehurst-vellinum í Norður-Karólínu.
Ólafía þarf að vera í hópi 45 efstu til að vera örugg með keppnisrétt á LPGA árið 2019 en allir sem verða jafnir í 45. sæti komast þangað þannig að fjöldinn er ekki nákvæmur.