Ólafía Þórunn Kristinsdóttir náði ekki að bæta stöðu sína er hún lék sjötta hringinn sinn á lokaúrtökumóti fyrir LPGA-mótaröðina í golfi á NO. 7-vellinum í Norður-Karólínuríki í dag. Ólafía lék á 74 höggum eða tveimur höggum yfir pari.
Ólafía hefur ekki náð sér á strik á mótinu og er hún á samtals 20 höggum yfir pari eftir sex hringi og langt frá því að vera á meðal þeirra 45 sem tryggja sér sæti í LPGA-mótaröðinni, þeirri sterkustu í heimi.
Hún er í 89. sæti af 101 kylfingi, tólf höggum frá því að komast á meðal 45 efstu þegar aðeins tveir hringir eru eftir og þarf hún því að leika gríðarlega vel til að eiga möguleika eftir áttunda og síðasta hringinn.