Valdís Þóra Jónsdóttir, atvinnukylfingur úr Leyni, hóf í dag leik á lokamóti Evrópumótaraðarinnar í golfi. Mótið fer fram á La Quinta-vellinum í Andalúsíu á Spáni.
Valdís Þóra lék fyrsta hringinn í dag á 76 höggum eða 5 höggum yfir pari. Valdís fór vel af stað og eftir sex fyrstu holurnar var hún á einu höggi undir pari en síðan fór að halla undan fæti hjá Skagakonunni. Hún fékk tvöfaldan skolla á sjöundu holunni og þrefaldan á þeirri áttundu. Á seinni níu holunum fékk hún einn fugl og tvo skolla. Þegar þetta er skrifað er Valdís Þóra í 78.-81. sæti en margir kylfingar eiga eftir að ljúka leik í dag.
Valdís er í 33. sæti á stigalista Evrópumótaraðarinnar. Þar munar mestu um árangur hennar á móti í Ástralíu snemma árs, þegar hún náði 3. sæti. Valdís hefur tvívegis á ferlinum náð 3. sæti á móti á Evrópumótaröðinni, og er það besti árangur íslensks kylfings á atvinnumóti á þessu stigi.