Kylfingurinn Guðmundur Ágúst Kristjánsson úr GR er með forystu eftir fyrsta hringinn á Mediter Real Estate Masters-mótinu í golfi sem hófst á Spáni í gær en mótið er hluti af Nordic Tour-atvinnumótaröðinni.
Guðmundur Ágúst lék hringinn á 64 höggum eða átta höggum undir pari. Hann fékk alls sex fugla og einn örn á hringnum, tapaði ekki höggi og er með þriggja högga forskot.
Þrír aðrir íslenskir kylfingar taka þátt í mótinu. Andri Þór Björnsson úr GR er í 7. sæti á þremur höggum undir pari. Hann fékk þrjá fugla og lék aðrar holur á pari.
Haraldur Franklín Magnús úr GR lék á einu höggi undir pari og er í 21. sæti. Hann fékk fjóra fugla, einn örn og fimm skolla á hringnum.
Íslandsmeistarinn Axel Bóasson úr Keili lék á 74 höggum eða tveimur höggum yfir pari og er í 56. sæti. Hann fékk fjóra fugla, þrjá skolla og einn skramba.