Guðrún Brá Björgvinsdóttir, Íslandsmeistari í golfi, hafnaði í áttunda sæti á Viaplay Ladies Finnish Open-mótinu í Messilä í Finnlandi. Guðrún lék þrjá hringi samanlagt á pari, en hún náði ekki að fylgja eftir glæsilegum fyrsta hring.
Guðrún lék á 75 höggum í dag, þremur höggum yfir pari. Hún fór á kostum á fyrsta hring og lék á 67 höggum og var efst ásamt Nina Pegova frá Rússlandi, sem að lokum vann mótið með nokkrum yfirburðum.
Samanlagt lék Guðrún á 216 höggum, líkt og fjórir aðrir kylfingar. Hún var sjö höggum frá Pegova.
Berglind Björnsdóttir komst einnig í gegnum niðurskurðinn en hún átti afar erfiðan dag og lék á 85 höggum, þrettán höggum yfir pari. Hún endaði í 57. sæti á samanlagt 20 höggum yfir pari.