Ólafía Þórunn Kristinsdóttir verður á meðal keppenda á Thornberry Creek mótinu í golfi sem hefst á fimmtudaginn en mótið er hluti af LPGA mótaröðinni.
Þetta kemur fram á kylfingur.is en mótið verður það fjórða sem Ólafía Þórunn tekur þátt í á LPGA-mótaröðinni á þessu tímabili en hún er með takmarkaðan þátttökurétt á þessari sterkustu mótaröð heims á þessu tímabili.
Ólafíu tókst ekki að komast í gegnum niðurskurðinn á þeim þremur mótum í LPGA-mótaröðinni sem hún hefur verið með í á þessu tímabili.
Um síðustu helgi keppti Ólafía á Prasco Charity mótinu sem er hluti af Symetra atvinnumótaröðinni þar sem henni tókst að komast í gegnum niðurskurðinn.