Kylfingurinn J.B. Holmes var að ljúka sínum öðrum hring á The Open sem nú fer fram á Royal Portrush-vellinum á Norður-Írlandi. Bandaríkjamaðurinn lék á samtals 68 höggum og var á þremur undir pari.
Holmes lék fyrsta hringinn á fimm höggum undir pari og var í efsta sæti fyrir annan daginn en hann er áfram í efsta sæti, ásamt Íranum Shane Lowry, á átta höggum undir pari. Lowry hefur leikið sex holur í dag en Englendingarnir Tommy Fleetwood og Lee Westwood koma næstir á sjö höggum undir pari.
Fleetwood hefur lokið keppni í dag en Westwood er á sautjándu braut og á því eina holu eftir. Alls eru þrír kylfingar jafnir í 5.-7. sæti á sex höggum undir pari og þá eru fjórir kylfingar jafnir á fimm höggum undir pari í 8.-11. sæti.