Valdís Þóra Jónsdóttir komst í dag í gegnum niðurskurðinn á opna Lacoste Ladies Open-mótinu í golfi í Frakklandi en mótið er hluti af LET-Evrópumótaröðinni, þeirri sterkustu hjá atvinnukylfingum í Evrópu í kvennaflokki.
Valdís Þóra var í erfiðum málum eftir fyrsta hring í gær, en lék á alsoddi í dag og komst áfram. Hún lék á 66 höggum, fimm höggum undir pari, og bætti sig um þrettán högg á milli hringja, en hún lék hringinn í gær á átta höggum yfir pari.
Valdís fékk sex fugla í dag, einn skolla og ellefu pör. Hún er í 36. sæti ásamt nokkrum öðrum kylfingum á þremur höggum yfir pari. Nelly Korda frá Bandaríkjunum er með yfirburði á toppnum á samanlagt tíu höggum undir pari, sex höggum á undan næstu kylfingum.